DADONG BUNGKUT

dadong bungkut, dadong bungkut
kudang tukel ampun maan ngantih benang
pedasang tiyang bulané ten makijap-kijapan
atukel dogén baang tiyang
ten lakar telah-telah koné baan tiyang nunun
ten lakar sedut tiyang ten lakar kutang tiyang
di pesu med tiyangé majemakan
lakar pejang tiyang lakar sepel tiyang
piyitang tiyang cara ental masungsung

dadong bungkut, dadong bungkut
kuluk dadongé nika té
ten makisid-kisid uli di samping dadongé
silap-silapina pelék dadongé
kanti kedas, ten tuyuh baana masugi
ampun pengaanga yéh mawadah janggi
pesu lumut baan ten taéné ngecir

dadong bungkut, dadong bungkut
sira mipisin batun gamet dadongé
di lemah-lemahé mirib sangkan ten taén tepukin tiyang
nanghing, baang tiyang benang atukel, énggalin naké
énggalan lemah, suwud dadariné ngrejang

• Komang Berata

ilustrasi